Synopsis: Honolulu County’s bulky refuse pickup is helpful for those who follow the instructions. But the careless discarding of trash and large items on the sides of the roads has the city looking “trashy.” Moreover, the convenience of this disposal program may inhibit the secondary consideration of the items’ usefulness to charitable organizations (e.g., Savers, Salvation Army) that not only provide for those in need but also slow the filling of our island’s limited disposal sites.

Aloha kākou e ko O’ahu, a pau pū ho’i me nā hoa mai ‘ō a ‘ō o ka moku’āina. ‘O ka loku nui ‘ana mai o ka ua i loko o kēlā mau mahina i hala aku nei, ua hele a uliuli maoli ka ‘āina. He nani mai ho’i kau! He ‘ao’ao ho’omāhuā na’e ko ka ua a he hemahema ka noho ‘ana. Hele a pelekunu nā lole a kawaū nā pono hale, a he kūkaeloli ko kēlā me kēia po’opo’o o ka hale. A ke pau ka pono o nā lako hale, hū a’e ka ‘ōpala ma nā kini a mōkākī aku ma kapa alanui.

Laki ka poe e noho ana ma O’ahu nei i ke kōkua o ke aupuni kalana i ka halihali ‘ana i ka ‘ōpala a ka lehulehu. Ke pau ka pono o kekahi mea, hiki ke kiloi ‘ia ma ke kini ‘ōpala ma’a mau o ka hale. A inā nui loa kekahi ‘āpana ‘ōpala a ‘a’ole nō ia e kū i loko o ke kini ‘ōpala, hiki nō ke waiho ‘ia ma kapa alanui. I ka lā i ho’opa’a ‘ia ma ka papa manawa, na nā limahana o ke aupuni kalana e lawe aku i ia mea i ke kahua ho’oleina ‘ōpala. Ua ho’okumu ‘ia kēia ‘oihana lawe ‘ōpala no ka pono o ka lehulehu a ua uku ‘ia me kā kākou kālā ‘auhau.

Eia kekahi, ia’u i ne’e ai i O’ahu, ua pū’iwa au i ka ‘ike aku i nā ahu ‘ōpala e waiho wale ana ma kapa alanui. Pēlā nō ma ko’u alanui e noho nei. Ua ‘ōlelo ‘ia mākou, ‘o ia ho’i nā hoa noho o ia kaiāulu, aia wale nō a hiki mai ka pō ma mua o ka lā halihali o ke kaiāulu, a laila, hiki ke waiho i ka ‘ōpala ma nā pīpā alanui. ‘A’ole na’e e maliu ‘ia kēia ‘ōlelo, a ‘o ka hopena, ‘o ia nā ahu ‘ōpala e pupuka ai ka nani o ka ‘āina. Aloha ‘ino! He aha ho’i kā kākou e hana ai?

Eia mai ka’u ha’ina. ‘A’ole nō kākou e kauka’i ma luna o ke aupuni, nāna e hana. Na kākou nō kēia kuleana e lawelawe. ‘A’ole nō i ma’alahi ke kiloi ‘ana i nā ‘āpana ‘ōpala nunui, akā, inā he mana’o ko kākou e kiloi i kekahi mea nunui, e huki like kākou i kō aku ai nō ia mana’o. E kōkua aku nō a kōkua mai nā hoa noho i maika’i ka pilina kanaka a i ma’ema’e ho’i ke kaiāulu. A inā ua mana’o ‘ia he ‘uko ‘ole kekahi ‘ikamu nunui a ua pau paha kona pono, hiki ke kāhea ‘ia nā hui lokomaika’i, e la’a me ka Salvation Army a me ka Savers paha, a na lākou ia mau mea e lawe aku a ho’oponopono, i hiki ke ho’ohana hou ‘ia.

‘O ia kekahi mea e hapa mai ai ka uluāhewa ‘ia o ka ‘ōpala ma nā ho’oleina ‘ōpala a pēia pū me nā pīpā alanui nani o kākou. ‘O ka ho’opō’aiapuni ka mea e pono ai. Na kākou nō ia e mālama i kēia ‘aina aloha i mau ai kona pono no nā hānauna e hiki mai ana. 

E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu 

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai‘i at Mānoa.