Synopsis: The Hōkūle’a has just completed the most dangerous leg of its world-wide voyage under Nainoa Thompson’s careful navigation, which is exciting for Hawai’i.

‘Auhea ‘oukou e nā hoa makamaka o ka ‘ōlelo Hawai’i mai uka a ke kai, mai kahi pae a kahi pae, aloha nō kākou. Ma ko’u noi’i ‘ana i kekahi mea nāna e ho’ohau’oli iā kākou, ua puka mai kekahi ‘atikala pili i ka holo ‘ana o ka Hōkūle’a a puni ka Honua. Ua holo ‘o Nainoa mā i kauwahi ‘āina o ka Honua nei; ma Mauritius, ma Aotearoa, ma Bali, a me nā wahi like he nui aku nō. ‘O kā lākou pahu hopu, ‘o ia ho’i ke a’o ‘ana aku i nā mea pili i ka mālama ‘āina.

I ka wā kahiko, ua mālama ko kākou mau kūpuna i ka ‘āina, a ua mālama ka ‘āina iā lākou kekahi. ‘O ia kekahi mea nui i ia mau lā; ua mālama lākou i ka ‘āina, no ka mea, ‘o ka ‘āina ke kaikua’ana a ‘o nā kānaka Hawai’i ke kaikaina. Aia kēia mana’o ma loko o nā mo’olelo kahiko. Ma ka mo’olelo o Hāloa, ua hānau ‘ia ‘elua mau keiki. Ua lilo ke kaikua’ana ‘o ia ke kalo mua loa ma kēia ‘āina nei, a ua lilo kona kaikaina ‘o ia ke kanaka mua loa. ‘O ia ka mea kū’i’o o kēia mo’olelo, ‘o ia ho’i, ‘o ka ‘āina ke kaikua’ana o kākou a pau. He mea nui no ka po’e Hawai’i kēia mālama ‘ana i ka ‘āina, a ua lilo kēia mana’o i pahu hopu no Nainoa mā i ko lākou holo moana ‘ana. Hilina’i kākou (ka po’e Hawai’i) iā Nainoa, i kona ho’okele ‘ana a me kona ha’i ‘ōlelo ‘ana i ka po’e o nā ‘āina ‘ē e pili ana i ka mālama ‘ana i ka Honua ma ka mana’o Hawai’i. 

Ma kēia holo ‘ana a puni ka Honua, wahi a ka pūnaewele puni honua o ka Hōkūle’a, ‘a’ole ho’ohāiki kēia mālama ‘ana i ka ‘āina wale nō. Ma loko o ka mana’o Hawai’i, ‘o kēia mana’o o ka “Mālama Honua,” ‘o ia ho’i nā ‘āina o ka honua a me nā kānaka, nā kai, nā holoholona a me nā mea a pau i koe. He ‘ano kūka’i a’o kēia holo ‘ana ma ka Hōkūle’a. Makemake nā luina Hōkūle’a e a’o mai i nā loina kūikawā o kēia mau ‘āina ‘ē o ka Honua nei, a makemake lākou e a’o aku i nā loina Hawai’i i nā lāhui e noho nei ma laila. ‘O ka mana’o nui o ke kūka’i a’o ‘ana, ‘o ia nō ka maopopo ‘ana i ke ‘ano kāka’ikahi o nā mea lako o ka ‘āina i kēia mau lā, a me ka nui o ko kākou kuleana e mālama nei i ko kākou mau ‘āina. 

Ua ho’āla hou ‘o Nainoa mā i ia mea ‘o ka ho’okele wa’a ‘ana me ka pānānā ‘ole. ‘O ia kekahi mea a kākou e ‘ike ‘ole nei i kēia mau lā, no ka mea, he mau ‘enehana hou ko kēia au, nāna e kōkua mai iā kākou. Ma o ka mālama ‘ana i kēia ‘ano ho’okele kahiko ma o nā hōkū o ka lani, nā ‘ale o ke kai, nā manu o ka lewa, ka pā ‘ana o ka makani, a me ia mea aku ia mea aku o ia ‘ano, ke hō’ike aku nei ‘o Nainoa i ka ikaika a me ke akamai o ko kākou mau kūpuna. He ‘ōlelo no’eau e pili ana i kēia hana, penei ho’i, “He loa ka ‘imina o ke ala o Hawai’i ‘imi loa.” Ma ka wehewehe ‘ana i ka mana’o o kēia ‘ōlelo no’eau, maopopo ia’u inā i noi’i ‘ole ‘o Nainoa i nā mea nui a me nā mea iki o ia mea he ho’okele wa’a ma o ka nānā ‘ana i nā hōkū, inā ua nalo kēia ‘ike iā kākou. He mea waiwai ka ho’okele ‘ana ma o nā hōkū, a maika’i ka pahu hopu o nā luina o ka Hōkūle’a i ko lākou holo ‘ana a puni ka Honua nei.

E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai‘i at Mānoa.