Synopsis: Let’s send good thoughts and prayers for the family of Daylenn Pua. And take this as a lesson for future hikers to not hike alone, no matter how proficient.

———

Welina e nā makamaka heluhelu. ‘O ia po’o mana’o e kau a’ela i luna, he ‘ōlelo ia e paipai ana i nā kānaka e alu like ma ka pule ‘ana. Ma mua, aia nō kahi kahuna i nui loa kona mana, ‘o ka pilikia, he hana ‘ino kāna i nā kānaka o kona wahi a pēlā pū me nā kaiāulu a puni. Ho’ā’o pākahi kekahi mau kāhuna e pule i pau ua kahuna ‘ino lā. ‘A’ole na’e i hiki iā lākou ke lanakila ma luna ona. A i kekahi lā, hiki maila kekahi kahuna a ho’opuka a’ela ‘o ia i ka mana’o, e alu like nā kāhuna ma ka pule ‘ana, a ‘o ia ihola nō ka mea i ho’opau ai lākou i ua kahuna lā. A ‘o ia ka mea i holo ai ia ‘ōlelo no’eau e kau a’ela i luna, ‘o ia ho’i, “E alu ka pule i Hakalau.” A ‘o ka mea i koho ‘ia ai ua ‘ōlelo no’eau nei i po’o mana’o no Kauakūkalahale i kēia lā, ‘o ia kahi ‘ōpiopio o ke Kula Kaiapuni ‘o ‘Ehunuikaimalino ma Kealakekua.

Ua lohe ‘ia aku nei paha e ‘oukou, e nā makamaka heluhelu, no ua ‘ōpiopio nei i nalowale aku nei i nā kuahiwi o nā Ko’olau. ‘O Daylenn Pua kona inoa. A i hele mai ‘o ia nei i O’ahu nei no kahi huaka’i. A e noho ana ‘o ia me kona kupunawahine ma Wai’anae. Kohu mea lā, ua pa’a kahi mana’o o Daylenn e pi’i aku no ke Alapi’i o Ha’ikū, a ua kaulana nō ho’i ma ka inoa ‘o ke Alapi’i i ka Lani. I kēlā Pō’alima aku nei, ha’alele ihola ‘o ia i ka hale o kona kupunawahine, a kau a’ela ma luna o ke ka’a lawe ‘ōhua. Ua kuhi ‘ia, ma ke awāwa ‘o Moanalua ‘o ia i ho’omaka ai i ka pi’i ‘ana no ka māhele hope o ke Alapi’i o Ha’ikū. I kuhi ‘ia pēlā ma muli o nā ki’i o Daylenn i kau aku nei ma ka Facebook i kēlā Pō’alima aku nei. A ‘o kahi mea minamina, ‘o ke ki’i hope loa o Daylenn i kau aku nei, ua pa’i ‘ia nō, ma mua pono ia o kahi māhele ‘ino a hāiki loa o ke ala hele. Ma hope mai o kēlā, ‘a’ole i kau hou kahi ki’i o Daylenn, a ‘a’ole i lohe ‘ia kona leo. A no laila, ua ho’omaka ka ‘imi ‘ana a’e o ke Ke’ena Kinai Ahi i ka Pō’aono. A e ‘imi a’e ana nō ho’i ka ‘ohana o Daylenn a me nā hoa aloha a me nā kānaka i makemake e kōkua. ‘A’ohe wahi mea a loa’a, a mana’o ihola ke Ke’ena Kinai Ahi e ho’ōki i ka ‘imi ‘ana, akā, ma muli o ka ‘ōlelo a kekahi mau kānaka ‘imi, ua lohe ‘ia kahi leo i ke kāhea ‘ana i ke kōkua, ho’omaka hou a’ela ka ‘imi ‘ana o ke Ke’ena Kinai Ahi i ka Pō’alua nei. Akā, i ke kani ‘ana o ka hola 2:00 o ka ‘auinalā, ua pau ihola ka hana a ke Ke’ena Kinai Ahi.

‘A’ole na’e i hā’awi pio ka ‘ohana a me nā hoa, a me nā kānaka i komo aku nei ka makemake i loko o lākou e kōkua. A no laila, ua noke aku nei lākou i ka ‘imi ‘ana, a komo pū ihola ka ‘Oihana Moku ma ka ho’ouna ‘ana i mokulele pinao a me kona pailaka a me nā limahana. A aia nō ho’i kekahi mau kānaka e ho’okele ana i kā lākou mau mokulele pailaka ‘ole me ke pa’i ki’i ‘ana iho i nā wahi o nā Ko’olau me ka mana’o, e ‘ike ‘ia ‘o Daylenn ma kekahi o ia mau ki’i. A hiki i ke kakahiaka o ka Pō’alima nei, ‘a’ohe wahi mea a loa’a o kahi hō’ailona. Ke lana nei ka mana’o, e loa’a koke ‘o Daylenn me ke kāmau ‘ana o ke ola ma ke kino. E alu ka pule i nā Ko’olau.

A ke lana nei nō ka mana’o o ko ‘oukou mea kākau, e lilo kēia i ha’awina no kākou, ‘o ia ho’i, ke hele wāwae mamao, a pi’i kuahiwi paha, e hele pū me ke kōko’olua a me ke kōko’okolu paha. A e lawe pū i nā pono, a ke kū a pilikia, ‘a’ole nō e pa’akīkī ka ‘imi ‘ana a loa’a.

Mahalo a nui i nā kānaka a pau i huliāmahi ma ka ‘imi ‘ana i kahi keiki o ka ‘āina.

This column is coordinated by Kawaihuelani Center for Hawaiian Language at the University of Hawai’i.