Synopsis: Maybe this new year will come with answers for important issues we faced in 2014.

Aloha Makahiki Hou e nā makamaka heluhelu o Kauakūkalahale. Ua pau iho nei ka makahiki 2014, a ‘o ka hiki maila nō ia o ka makahiki 2015. Ua nui nā mea i ‘ike ‘ia ma ka makahiki i hala iho nei, ‘o nā mea maika’i, a me nā mea maika’i ‘ole. ‘O kekahi, he mau nīnau mai nā makahiki i hala, ‘o ka nīnau no ka mea kanu i ho’ololi ‘ia kona ‘ano iho, ‘o ke kūkulu ‘ia ‘ana a’e o ke ka’a uila kau i ka lewa, ‘o ka po’e kuewa a hale ‘ole ho’i, a me kekahi mau mea hou aku.

‘O ka mea ‘āpiki, e ho’omau ‘ia ana nō ia mau kūkākūkā ‘ana no ia mau mea. ‘O kekahi mea maika’i, ua ‘ike maopopo ‘ia nō kekahi mau mea. No ka mea kanu i ho’ololi ‘ia kona ‘ano iho, ua ‘ike ‘ia, ‘a’ole e lanakila wale ka mea nāna ka pu’u kālā nui loa. ‘O nā kānaka a me nā hui e kū’ē aku ana i ka pāloka e pāpā ana no ka manawa i ka mea kanu i ho’ololi ‘ia kona ‘ano iho, ua ho’oulu lākou i kahi pu’u kālā he ‘ewalu miliona a emi iki iho. ‘O ka hopena, ua ‘ane’ane e pa’i a pa’i nā ‘ao’ao ‘elua. ‘A’ole na’e i lawa ia pu’u kālā nui loa e kāpae ‘ia ai ia pāpā ‘ana.

No ke ka’a uila kau i ka lewa, he nui loa ka pilikia. Ua kuhi ‘ia, e māhuahua ana ke kālā e ho’olilo ‘ia ana no ka hana he ‘elima haneli miliona kālā a ‘oi ma luna a’e o ka mea i mana’o ‘ia, he $5.26 biliona.

No nā kānaka kuewa a hale ‘ole ho’i, ua ‘āpono ‘ia ma O’ahu nei kekahi mau kānāwai e pilikia ai ka po’e kuewa. ‘A’ole maopopo i ko ‘oukou mea kākau, inā he mea kēia e kūkākūkā ‘ia ma kēia makahiki hou, akā, ke lana nei ka mana’o, e no’ono’o nā luna kau kānāwai i mau mea hou e mālama pono ‘ia ai ia mau kānaka kuewa.

I kēia makahiki hou, e hiki pū mai kekahi mau mana’o maika’i e holo mua ai kākou ma ke ala e pono ai kākou. Inā e mana’o ana nā kānaka a me nā hui ho’oulu mea kanu i ho’olohi ‘ia kona ‘ano iho, he mea maika’i ia, e noi’i lākou a hō’oia a’e i ka lehulehu i hiki ke hilina’i ‘ia kā lākou ‘ōlelo. He aha lā ka mea e pono ai ke ka’a uila kau i ka lewa a me nā kānaka kuewa, akā, aia paha ka ha’ina i kekahi.

‘O kekahi mau mea maika’i o ka makahiki i hala iho nei, ‘o ia ka ‘ike ‘ia ‘ana o ka hana maika’i wale a kekahi mau keiki o Hawai’i nei e hō’ike ana ē he hiki nō i ko Hawai’i ke ho’okūkū me ko ka honua nei. ‘O kekahi, ‘o ia ‘o Marcus Mariota, ‘o ka mea mua o Hawai’i nei i kā’ili i ka Makana Heisman. A lanakila aku nei ‘o Mariota a me nā Kakā o ‘Olekona ma luna o Pololika Moku’āina ma ka helu ‘ai he 59 i ka 20 a holo mua ai nā Kakā i ka ho’okūkū inoa moho, kahi o lākou e kū’ē ai iā ‘Ohaio Moku’āina. Ke kali nei kākou ‘o ka ho’oholo ‘ana o Mariota i kona mana’o e pā’ani pōpō pekupeku ma ke ‘ano he loea, a i ‘ole ia e ho’omau i ka hele kulanui ‘ana a me ka pā’ani ‘ana me nā Kakā. He mea ‘ole kona ala e hele ai, ‘o ka mea maopopo, he kumu alaka’i maika’i ‘o ia no nā keiki.

Me ke aloha iā ‘oukou e nā makamaka heluhelu, a e hana kākou no ka pono o nā keiki a kākou.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.