Synopsis: Darren Wilson told his side of the story. Did he have justification for shooting Michael Brown in the top of his skull?

‘O ke kumu e kau a’ela ia ‘ōlelo no’eau i po’o mana’o no ka mo’olelo o kēia lā, ‘o ia ho’i, ‘o ka pōpoki, he ‘ōlelo ia no ka māka’i. A ‘o kahi māka’i ke kumuhana o Kauakūkalahale i kēia lā.

Aloha nō ka ‘ohana o Michael Brown, ka ‘ōpiopio i kī ‘ia i ka pū e kekahi māka’i o Ferguson, Kāna Lui a make. I ka Pō’akahi nei, ua kūkala ‘ia ka ‘ōlelo ho’oholo a ke kiule nui, ‘a’ole e ho’opi’i ‘ia ua māka’i lā, ‘o Darren Wilson kona inoa, no ka pepehi kanaka ma ke kekelē ‘ekahi a ma kekahi kalaima ‘ē aku. ‘O ka mea minamina, ua lawe ‘ia aku ke ola o ke kanaka, o Michael Brown ho’i, a ‘a’ohe āna pū e pa’a ana ma kona lima.

‘O kekahi mea i hāpai ‘ia, ‘o ia ho’i, he hana ho’okae ‘ili ia, ‘oiai, ‘o Wilson, ka māka’i nāna i kī iā Brown i ka pū, he haole ia, a ‘o Brown, he Pā’ele ia. Akā, inā ‘o ia kekahi mea e komo ma kēia kūkākūkā ‘ana, e hui aku, hui mai, hui kalo me ka nāwao. Inā paha na kekahi māka’i Pā’ele i kī aku i ka pū, inā ua maika’i ia lawe ‘ia ‘ana aku o ke ola o Brown? ‘A’ole loa! ‘O ka mea nui, ‘o ia ka lawe ‘ia ‘ana o ke ola o ke kanaka me ke kumu ‘ole. ‘A’ohe pū a Brown, akā, he ‘eono pōkā i kī ‘ia a kū kona kino. A ‘o kekahi o ia mau pōkā, ua komo aku ma luna o ka iwi po’o o Brown, a no laila, ke kuhi ‘ia nei, e kūnou ana kona po’o i lalo, a ‘o ia paha ka pōkā hope loa i kī ‘ia aku a kū ‘o ia. ‘Oiai, aia ma luna o ka iwi po’o, he mea maopopo, e hina ana paha ‘o Brown i lalo, a i ‘ole ia, e holo ana ‘o Brown no ka hopu ‘ana aku iā Wilson. Akā, ma ia mau kūlana ‘elua, ‘a’ole e nānā ana ‘o Brown i kona wahi e holo ana, no laila, inā e ho’ā’o ana ‘o Brown e hopu iā Wilson, ‘a’ole ‘o ia i ‘ike i kahi o Wilson, ‘oiai, aia kona mau maka i lalo e nānā ana. Ua hiki iā Wilson ke lele wale aku i kekahi ‘ao’ao, a kā’alo ana ‘o Brown, a ua hiki nō ho’i iā Wilson ke ho’ōkupe iā Brown, a hina ‘o ia i lalo.

Ua ‘ōlelo ‘o Wilson, he keu ‘o Brown a ke kanaka ikaika, a me he mea lā, he pēpē wale nō ‘o Wilson, he ‘elima paha makahiki, a ‘o Brown, ‘o Hulk Hogan kona hoa like ma ka ikaika. A no laila, wahi a Wilson, ua kau kona weli o make ‘o ia iā Brown. A wahi a Wilson, aia ‘o Brown he 8 a 10 paha kapua’i mai iā ia aku, a ‘o ia ka wā a Brown i ho’omaka ai e lālau lima iā ia, a ‘o ia kona wā i kuhikuhi ai i kāna pū a ‘ike akula iā luna o ke po’o o Brown, a kī akula. Akā, e like me ka mea i hō’ike ‘ia a’e nei i luna, he koho kā Wilson, ‘o ia ho’i, e lele aku ma kekahi ‘ao’ao, a kā’alo ana ‘o Brown, ‘oiai, ‘a’ole e nānā ana ‘o Brown i kona wahi e holo ana.

He hana kūpono ‘ole ka hana a Wilson, a he kūpono kona ho’opi’i ‘ia ‘ana. Akā, ‘a’ole i maopopo i ko ‘oukou mea kākau ka hana a Brown. Inā e holo ana ‘o ia no ka māka’i, ‘a’ole ia he hana akamai. A inā ua ‘ā’ume’ume ‘o ia me ka māka’i, ‘a’ole ia he hana akamai. Akā, ‘a’ole ia mau hana he mau mea e kī ‘ia ai ke kanaka i ka pū a make.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.