Synopsis: Three boys decide to steal hubcaps to complete the look of their car, and to impress girls.

———

No nā mea heluhelu aloha o Kauakūkalahale e ‘imi ana a e noho ana i ka pono sivila o ka ‘āina, e kāmoe aku nei ho’i ma ke ala pono, ke aloha nui lā iā ‘oukou a pau. A iā ‘oukou ‘eā, e ka po’e e ‘auana hewa nei i ke ala o ka pōā a me ka ‘aihue, aloha nō ka hopena o ka hele kīke’eke’e, no ‘oukou ho’i ia. Eia nō na’e, he ha’awina kēia no ‘oukou e ho’opa’a ai.

‘Ekolu ‘ōpio kolohe kēia e noho ana a e no’ono’o ana i ka ho’oponopono i ke ka’a o Kaua, kekahi o ua mau keiki ‘ekolu nei. He holo nō ka ‘enekini me ka maika’i, a ‘o luna o ke ka’a, ua maiau nō ho’i i ka ho’oma’ema’e pinepine ‘ia. ‘O ke kumu nō na’e o ia mana’o ho’oponopono, i mea nō ho’i ia e hō’oio ai nā keiki ‘ekolu i mua o nā wāhine, ‘o ia nō ‘oe ‘o ka moa kāne e ho’okahakaha ana i mua o nā moa wahine. ‘A’ole nō i mio loa ke ka’a i ia manawa. Ho’okahi wale nō mea e koe ana a pa’a mio loa ke ka’a o Kaua, ‘o ka pāpale huila nani loa. ‘O ia ihola nō ka mea e lilelile ai ka holo ‘ana o ke ka’a.

No’ono’o ihola ua mau keiki nei i ka hana e loa’a mai ai he mau pāpale huila mio, no ka mea, ‘a’ole a lākou kālā e kū’ai aku ai. I ia nūnēnūnē ‘ana, komo wale ihola ka mana’o i loko o Ha’a, kahi hoa o Kaua, e hele lākou ‘ekolu, me kekahi hoa aku, ‘o Lulu, i ka ‘aihue pāpale huila Cadillac, ‘oiai ma ia wā, ‘o ia nō nā pāpale huila mio loa. Kānalua ihola o Kaua i ka hana ‘aihue. ‘O ke akamai loa na’e o kona mau hoa i ka waha palu, ‘o ko ia nei ‘ae akula nō ia. Nīnau akula ‘o Kaua iā Ha’a, “Aia lā i hea kahi e loa’a mai ai ka pāpale huila Cadillac?” Pane maila kēlā, “Aia i Waikīkī, kahi o ka po’e waiwai. He ‘aihue pono kēia, no ka mea, ‘a’ole e ‘eha ka po’e hiehie o Waikīkī i ka lilo aku o ka pāpale huila.”

I ia ahiahi, kau lākou ‘ekolu ma luna o ke ka’a o Kaua a kalaiwa akula i Waikīkī. ‘O ia holoholo nō ia a ‘ike akula lākou he ka’a Cadillac e kū ana ma ka’e o ke alanui. Mana’o ihola ‘o Kaua ‘o ia ana nō ke ka’a Cadillac e loa’a mai ai nā pāpale huila e nani ai kona ka’a. ‘O ka mea ‘āpiki na’e, aia ua ka’a nei ma ke alanui ‘o Kūhiō, kahi e kā’alo’alo nui ‘ia e ka po’e māka’ika’i a kū’ai hele ho’i. Pi’i a’ela ka pīhoihoi a me ka ha’alulu ho’i o nā keiki. Eia na’e, ua kālele nui ko lākou no’ono’o i ka pāpale huila lilelile e nani ai ke ka’a, ka mea ho’i e lilo ai lākou i mea nui i mua o nā wāhine. A lilo ia mana’o i mea e hapa mai ai ka hopohopo. ‘O ke kalaiwa akula nō ia a kokoke i ke ka’a Cadillac me ka pa’a o ka hao ‘ōhiki i ka lima. I ka ho’okū ‘ia o ke ka’a, ‘o ka lele akula nō ia o lākou i waho, a me ka wikiwiki loa, ho’ō ‘ia ihola ka hao ‘ōhiki. He une aku, a he une mai, hemo a’ela nā pāpale huila. ‘O ko lākou lele a’ela nō ia ma luna o ko lākou ka’a me ka pa’a o ka pāpale huila i ka lima. A iā lākou e hue aku ana, kani ka leo hulō me ka piha ha’aheo, a hū a’ela ho’i ka mana’o no kā lākou hana maika’i he ‘aihue. Eia nō na’e, ua oki koke ihola ka le’ale’a i ka ‘upu ‘ana a’e o ka ho’omana’o ‘ana o Kaua, he ‘ekolu wale nō pāpale huila i loa’a mai!

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.