Synopsis: America is already flooded with small firearms. Why would anyone want to make ghost guns legal? That will just exacerbate the problem.
Aloha mai nō kākou e nā makamaka e noho nei ma loko o ka maluhia. Eia nō kauwahi po‘e puni pū ke mana‘o nei e hō‘ale‘ale a‘e i ke kai ua lana mālie. I ka wā iā Biden e noho ana ‘o ia ka pelekikena, ua kau ‘ia kahi lula e pāpā ana i ke kū‘ai ‘ana i ia mea he pū lapu (ghost gun). I kēia au hou na‘e, ua hala a‘ela ke kū ‘ana o kahi Biden i ka moku, a he ali‘i hou ke kū nei. A no laila, ke mana‘o nei ua po‘e puni pū nei, i wā kūpono nō paha kēia e ho‘opi‘i ai i ia lula a Biden. Eia nō ka mea ho‘oweliweli, ua ho‘opi‘i ‘ia kā Biden lula ma loko o nā hale ho‘okolokolo, a eia nō ua hō‘ea aku i mua o ka ‘Aha Ho‘okolokolo Ki‘eki‘e o ‘Amelika. A ua maopopo nō iā kākou ke ‘ano o ia ‘aha. ‘A‘ohe o lākou hoihoi i ka ‘au‘a ‘ana i nā pono siwila o ka lehulehu, a pau pū ho‘i me ko lākou pono hāpai pū. ‘O ka mea ‘āpiki, he au hou kēia a he ‘oko‘a ke ‘ano o nā pū, a ‘oko‘a pū ho‘i me nā wahi e loa‘a mai ai. A no laila, ma kona kākau ‘ana i ka mana‘o o ka Hale Ho‘okolokolo Ki‘eki‘e no kēia nīnau, ua hō‘ole aku ka luna kānāwai nui, ‘o Neil Gorsuch, i ia ho‘opi‘i ‘ana.
E nānā paha kākou i ia mea he pū lapu. He mea kaua ia i hiki ke kū‘ai wale ‘ia ma o ka leka. ‘O ia ho‘i, ua like me nā mea kū‘ai ‘ē a‘e, inā e ‘oka ‘ia a uku ‘ia ma o ka leka, ‘a‘ole nō a he wā, e halihali wale ‘ia mai kahi pū‘olo i piha i nā ‘āpana pū. He kāpili wale aku ka hana a e pa‘a mai ana kahi pū i ka lima. A eia ka mea ‘āpiki, ‘a‘ole e kākau inoa ‘ia ua pū nei e ke aupuni, a ‘a‘ohe wahi ho‘omaopopo ‘ia o ka mea nāna ia e lawelawe nei. A no ia mea, ‘a‘ole hiki ke ‘ike ‘ia ke ‘ano o ke kanaka nāna ia ia e hāpai nei a me ko ia ala mo‘olelo ho‘i. Mali‘a he mea pepehi kanaka a he hana pōwā paha me ka ‘apakau aku i kā ha‘i mea waiwai. Eia hou ho‘i, ‘a‘ohe helu ma luna o ia pū i mea e ho‘okolokolo ai i ka mea nāna ia i kī aku. ‘O ia nō paha ke kumu i kapa ‘ia ai he pū lapu. I loko o ka nui o ko‘u hoka i nā mana‘o ho‘oholo o ka ‘Aha Ho‘okolokolo Ki‘eki‘e i kēia mau lā, he nui ko‘u mahalo iā lākou no ka hō‘ole ‘ana i ka pū lapu. He 6 ka heluna e hō‘ole ana a he 2 wale nō e kāko‘o ana.
I loko o kēlā mau makahiki aku nei, he mau ‘atikala ka‘u o ke kākau ‘ana no kēia kumuhana ho‘okahi nō, ‘o ka hāpai pū. I ka makahiki 2021 (4/24/2021), ua kākau au i kekahi ‘atikala nona ke po‘o ‘o “Āhea e pau ai ka ho‘ohihi i ka pū?” Ma ka noi‘i ‘ana i nā nīnau nui o ia kumuhana, ua loa‘a maila kekahi mau heluna no ka po‘e mea pū o ‘Amelika. Ua ‘oi loa aku ma mua o nā ‘āina ‘ē a‘e o ka honua. ‘O ia ho‘i, i ka MH 2018, he 392 miliona pū kai helu ‘ia ma ‘Amelika, a he 326 wale nō miliona kānaka (pau pū ho‘i me ka po‘e kaniko‘o a me nā kamali‘i ho‘i), a‘o ia ka heluna o nā pū li‘ili‘i wale nō. Inā ho‘i e ho‘opu‘unaue ‘ia ka nui o nā pū i ka nui o nā kānaka, he 1.2 pū o kēlā me kēia kanaka.
‘Eā, e ka makamaka, ma ka nānā ‘ana i ka ‘awelika maoli o nā pū o kēlā me kēia kanaka ‘ona pū, ‘a‘ole paha e helu ‘ia nā kānaka a pau, no ka mea, nui loa ka po‘e, e like me a‘u, i hoihoi ‘ole i ka hāpai pū. Inā pēlā, e nui hou aku ka heluna o nā pū i loa‘a i kēlā me kēia kanaka mea pū. He aha lā ho‘i ke kumu o ka mālama ‘aa i nā pū he nui? A he aha lā nō ho‘i ke kumu e paipai ai i ia mea he pū lapu? No‘u iho, he hana lapuwale ia, a pēlā nō paha ka mana‘o o Gorsuch mā.
E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 808-956-2627 (Laiana)
>> 808-956-2627 (Kekeha)
This column is coordinated by Kawaihuelani Center for Hawaiian Language at the University of Hawai‘i at Mānoa.
