Synopsis: People tend to trim or wax their nose hairs for both comfort and style. Some scientists are saying that doing so removes a natural defense mechanism against disease, and the act itself can actually be dangerous.
E nā makamaka heluhelu ē. Hau‘oili Makahiki Hou a Lonoikamakahiki! Eia nō kā ‘oukou wahi mea kākau ke pale aku nei i ka hō‘ea mai o ka hopena ‘elemakule, ke a‘o nei ho‘i i nā mea hou, a i kumu ho‘i ia e hau’oli ai ka na‘au i loko o kēia wā Makahiki. I loko o kēlā mau makahiki i hala aku nei he nui wale o ka wā o‘o, he mea ho‘onāukikuki ia mea he huluhulu kau i ka puka ihu. He mea nō e mane‘o ai ka ihu a kihe ai paha ke kanaka nona ia ihu me ka ho‘okī aku i ua mea ho‘omane‘o nei. ‘Eā e ka makamaka, he mau ‘ōlelo no‘eau pili i kēia ‘ano huluhulu, ‘o ia ho‘i, ‘o ka helu 600 a me ka helu 1206 i loko o ka puke a Pukui (1983). Ua pili ia i kekahi kanaka punahele a ke ali‘i. ‘A‘ole nō i makemake ‘ia ua kanaka nei e kona mau hoa kanaka ma muli o ko ia ala ho‘opili ali‘i ‘ana. Ma ‘ane‘i na‘e, he mea ia e nāukiuki ai ka mea nona ka ihu e mane‘o nei!
Ua lilo ia huluhulu kau puka ihu i pula kau maka no‘u e uluhua ai. A no laila, ke hāpai nei au i ia mea he huluhulu weuweu maoli a me ko‘u ‘i‘ini nui e ‘ako i ia mea a pau ai ka mane‘o. No nā makahiki he nui, he ‘ako nō ka‘u me ka ‘ūpā li‘ili‘i. ‘O kekahi mau hana e wehe ‘ia ai ia huluhulu, ua hāpai ‘ia i loko o kekahi ‘atikala i kākau ‘ia e Michelle Rostamian no ka Huffington Post. ‘O kekahi mau hana, ‘o ia ka hamo ‘ana i ka uepa, ka huhuki ‘ana a hemo, a me ka ‘ako ‘ana me ka ‘ūpā a mīkini paha. Hō‘ike maila na‘e ‘o ia ala i kekahi mau pilikia o ia mau hana. ‘O ka mea e maka‘u loa ai, ‘o ia ka moku ‘ana o ka ‘ili i loko o ka puka ihu. Inā nō e moku, lō‘ihi ke kahe ‘ana o ke koko, no ka mea, palupalu ka ‘i‘o o loko a ‘a‘ole e kōhi koke ‘ia kahi i moku a ola hou mai.
Wahi Michael Jacobs, he kauka mālama ‘ili no Nū Ioka, he mau kumu e ulu ai nā huluhulu puka ihu, ‘o ia ho‘i, he pale aku lākou i nā mūhune ‘ino i ‘ole e komo wale mai i loko o ke kino ma o ka puka ihu, a hō‘ino mai i ka ‘ōnaehana hanu. Eia hou, inā auane‘i e lele mai kekahi mū ‘u‘uku a komo i loko o ka puka ihu, e pā ana ua mau huluhulu nei a lilo ia i mea e kihe ai ke kanaka. Pēlā e kīpeku ‘ia ai ua mū nei a pakele ai ke kino i ka ma‘i. Eia hou, he kōkua nā huluhulu i ka mālama ‘ana i ke kūlana kawaū o loko o ka puka ihu a me ka hō‘olu‘olu ‘ana i ka ‘ōnaehana hanu. He pilikia ho‘i kā ka hamo uepa. Wahi a ke Kauka Nicole Aaronson, he kauka no ka pepeiao, ka ihu, a me ke koloko ma Delaware, he mau hopena maika‘i ‘ole ko ka hamo uepa. ‘O kekahi, he mea ia e nāwaliwali ai ka ‘ili o loko o ka puka ihu, a komo ai ho‘i ka mū ho‘opalahēhē.
Eia nāhi hā‘ina ‘elua o kēia nīnau wāhi puka ihu. ‘O kekahi kumu e wehe ai i nā huluhulu puka ihu, ‘o ia nō ka hana nui o ka ho‘omanawanui ‘ana i ka mane‘o. ‘O ia ihola ko‘u pilikia. ‘O kekahi na‘e, ke mana‘o ‘ia nei ua ‘oi aku ka nani o ke kanaka ke maiau kona mālama ‘ana i ka ma‘ema‘e o ia mau huluhulu. No‘u iho, inā hiki ia‘u ke ho‘omanawanui i ka mane‘o a ka huluhulu weuweu, i mea ho‘i e pakele ai ke kino i ka ‘ino, ua hiki i ke kanaka puni maiau ke ho‘ololi i kona mana‘o no ia mea he maiau. Hiki iā ia ke waiho i ka ihu a ulu ka hulu. Inā e laha aku ia ‘ano no‘ono‘o ma waena o ka lehulehu, mali‘a o lilo auane‘i ka puka ‘ana o ka huluhulu i waho o ka puka ihu i mea nani e mahalo ‘ia ai e nā hoa kanaka. Hele nō a he mea ma‘amau, pau kona ‘ano he nīnau.
