Synopsis: There is serious debate as to whether the suspected killer of the CEO of UnitedHealthcare is a hero or a villain. Is it possible to “return evil for evil?”
Aloha mai nō kākou. Pau loa nō paha ko kākou mau pepeiao i ka lohe aku i kahi nūhou ha‘aku‘ia mana‘o o kēlā pule i hala aku nei. ‘A‘ohe wahi pepeiao i pakele i ka lohe no ka pepehi kanaka ‘ana i lawelawe ‘ia ma Nū Ioka. He kīpū ka hana, a ua pa‘a nō i ka wikiō ‘ia! ‘Akahi nō a pa‘a mai i nā māka‘i o Penekelewinia, i ka pule nei, kahi kanaka nona ka inoa ‘o Luigi Mangione, a eia ke ho‘ohuoi ‘ia nei ‘o ia ka mea nāna i pepehi iā Brian Thompson, ka luna o kekahi hui kū‘ai ‘inikua. Ke pa‘a nei ua ‘o Luigi i ka halewai o Penekelewinia, ke pale aku nei lāua me kona loio i kona ho‘iho‘i ‘ia aku i Nū Ioka, kahi i pepehi ‘ia ai ‘o Thompson. Ma laila nō e hiki ai ke ho‘okolokolo ‘ia ‘o Luigi ma ke kūlana pepehi kanaka. A no laila, aia ko‘u hāpai ‘ana i kahi mea ‘āpiki no kēia mo‘olelo a hō‘ike akāka aku i ko‘u kū‘ē ‘ana i ia hana ‘o ka pepehi kanaka.
Inā nō ‘o Luigi kai hane, he aha lā kāna o ka hana ‘ana aku pēlā? He keiki ia no kekahi ‘ohana kū‘ono‘ono, a he keiki akamai nō ho‘i. Ua puka ‘o ia ma kona kula ki‘eki‘e ma ke kūlana kau i ka hano hāweo, a nāna i kū mai no ka ha‘i‘ōlelo hope loa. Ua puka ho‘i ma ke Kulanui o Penekelewinia me nā kekelē laepua a laeo‘o ho‘i ma loko o ka ‘ike kamepiula. Me he mea lā, ‘a‘ohe ona mea e nele ai. ‘Eā, e ka makamaka, ‘a‘ohe o‘u ‘ike i ke kumu a kekahi kanaka e lawelawe ai i kēlā me kēia hana. He kuhi wale nō ka‘u ma hope o ka lohe ‘ana i nā hō‘ike ma ka nūhou (ma mua o ka pō Pō‘akolu). Eia mai nō ho‘i. I hana ia nona e hō‘ike ai i kona menemene no kona po‘e hoa kanaka e pilikia nei i ka nui o ka ‘ai‘ē i māhuahua mai ma muli o ka lapa‘au ‘ana. A ‘o ka mea ‘āpiki, ‘ano kāka‘ikahi ka ‘ae ‘ana o ka hui ‘inikua i ka ho‘oka‘a i ia ‘ai‘ē. Kohu mea lā, ‘o lākou lā me ia nei, ho‘okahi ka hoka!
E nānā paha kākou i ke ‘ano o ko Luigi hopu ‘ia ‘ana. E noho ana nō ‘o ia i loko o kekahi McDonald’s ma Altoona, Penekelewinia, a ‘ike maila kekahi limahana he kohu like ka helehelena me ke ki‘i i ho‘olaha ‘ia ma luna o ke kīwī. Kāhea akula kēlā i ka māka‘i. ‘A‘ole nō a he wā, holo maila nā māka‘i he nui. Hele a lē‘ī ‘o McDonald’s, i ka nu‘a nā māka‘i! Iā lākou nō a ‘ike maka i kahi Luigi, ‘o kona hopu koke ‘ia a pa‘a i ka ‘apo lima hao. Ua hō‘ike ‘ia ma ka nūhou, he wahine ua limahana nei, a he $50,000 ana paha ka makana e lilo ana iā ia mai ka FBI mai, pau pū ho‘i me nā kālā he $10,000 mai ka ‘oihana māka‘i mai o Nū Ioka. He kālā ke kumu a ua wahine nei i pekapeka ai, a i ‘ole he pono?
Eia nō ke ‘ōlelo ‘ia nei ua hele a pupule ua ‘o Luigi a ‘o ia nō paha ke kumu āna i pepehi ai iā Thompson. ‘A‘ohe o‘u wahi ‘ike i ke kālai no‘ono‘o, a no laila, e ku‘ihē au i ke kuhi aku i ka pupule a me ka ‘ole, a ku‘ihē pū ho‘i i ke kuhi aku i ke kumu a kekahi kanaka e lawelawe ai i kāna hana. A no laila, inā nō paha e ‘ike ‘ia auane‘i ‘o Luigi nō ka lima koko, mali‘a ua mana‘o ‘o ia he hana pono kāna. ‘O ia ho‘i, he hana ia e pale ai i ka ‘ino. Ke mahalo ‘ia nei ‘o ia e kekahi po‘e, no ka mea, e lilo ana paha kāna hana pepehi kanaka i mea e loli ai ke ‘ano ‘ānunu o nā hui ‘inikua. Eia mai nō kahi nīnau wāhi pūniu: Āhea e loli ai ke ‘ano ‘ānunu o ia mau hui?
