Synopsis: The Department of Land and Natural Resources is cracking down on hotels and companies that are presetting beach chairs and umbrellas that are unoccupied and unused. This issue will likely be rendered moot within the next 50 years due to sea level rise.
Aloha mai e nā hoa holoholo kahakai. Ināhea ‘oukou i hehi hope aku nei ma luna o ke one kaulana o Waikīkī? Ua alahula ia wahi ia‘u i loko o ko‘u wā ‘ōpiopio. I kēia mau makahiki na‘e e holo wikiwiki a‘e nei, kāka‘ikahi wale nō nā manawa e pā ai ku‘u poho wāwae i ia one. He mea minamina nō ia, no ka mea, i loko o kēlā mau makahiki i hala aku nei, ua ‘ikea ka pi‘i ‘ana a‘e o ka ‘ili kai a me ka ‘a‘ai ‘ia ho‘i o ka ‘aeone e nā nalu a me ke kai nu‘u mai. Emi mai ana ka ‘āina o ia uka a, ‘o ua one kaulana nei o Waikīkī, e lawe ‘ia aku ana i kai a waiho wale ‘ia ana ma ka papakū o ka moana. I kupu hou mai auane‘i ka mana‘o o kahi ‘elemakule nei e ho‘i hou aku i laila, mali‘a o pau loa ke one, a me ka lepo, a he hoka ho‘i ka hopena.
No ka ‘a‘aiawā mau ‘ia o ia kaha, ua hele a hāiki wale mai nō ke kahaone, a no kona pili loa i nā hōkele, ua lilo ia i alahula no nā malihini, kahi ho‘i e ‘ōlala pa‘apū ai i ko lākou mau kino ‘ilikea i ka lā, he kohu kini makalē ka hoa like. I kēia mau lā a‘u o ke kā‘alo kāka‘ikahi ‘ana i ia wahi, aia au ma luna o ke ka‘a. ‘A‘ohe o‘u wahi mana‘o e ‘imi i wahi ho‘okū ka‘a i mea e kū ai ma laila a lu‘u paha i loko o ia kai. ‘A‘ohe ho‘i o‘u mana‘o iki e ‘ōlala i ka lā! E wela ana ka ‘ili! Aia nō na‘e paha kekahi po‘e kūloko o Hawai‘i nei e mana‘o nei e noho ma ia kaha. He po‘e he‘e nalu paha, he po‘e lawai‘a paha, he po‘e nānā wale aku i ke komo ‘ana o ka lā i ke ahiahi, a me ia po‘e aku ia po‘e aku. ‘Eā, e nā makamaka kūloko, e hoka ana nō kākou! ‘O ia ho‘i, nui ka po‘e ma Waikīkī e ‘imi ana i ola no ka ‘ohana, a ‘o kekahi, he kūkulu lākou i nā noho kahakai a me nā māmalu nunui, a e ho‘okapu i nā wahi a pau o laila no nā malihini. ‘O ka hopena, e hoka ana kākou po‘e kūloko.
‘O ka pilikia nui, i kekahi manawa, na ka noho a me ka māmalu wale nō ke ‘ōlala i ka lā, ‘a‘ohe ona malihini ma laila! Ua lilo kēia ‘ano hana i nīnau nui no ka DLNR, a i mea e kaulike ai ka ho‘ohana ‘ia o ia mau ‘aeone, ua kauoha lākou i nā hōkele a me nā hui nāna ke kūkulu i ia mau noho a māmalu paha, e ho‘ōki i ia hana, he kū‘ē kānāwai (Act 227 o ka Hawai‘i Revised Statutes). Aia wale nō ke kūkulu ‘ana i ia mau mea a hō‘ea kino mai kona kanaka. ‘O nā hōkele i kuhikuhi ‘ia, ‘o ia ka Moana Surfrider, ka Outrigger Waikīkī, ka Royal Hawaiian Hotel, a me ka Sheraton Waikīkī Beach Resort. ‘O nā hui ho‘i i kuhikuhi ‘ia, ‘o ia ka Waikīkī Beach Beachboys (ma ka Sheraton), ka Waikīkī Beach Services (ma ka Royal Hawaiian), Aqualani, Faith Hawaii Surf School LLC, a me ke Aloha Beach Services.
‘O ka ‘oia‘i‘o, e like me ka‘u i kākau ai ma luna, he kāka‘ikahi paha ka po‘e kūloko e ‘imi ana i wahi ‘āpana kahaone e ‘ōlala wale ai i ka lā. Ua loli loa kona ‘ano mai ko‘u wā kamali‘i mai a i kēia wā. He kāka‘ikahi wale nō ka po‘e kūloko e ‘ōlala ana i mua o ia mau hōkele. Eia hou, ‘o kekahi kumu nui o ka hāiki ‘ana mai o ke kahaone, ‘o ia ka pi‘i ‘ana o ka ‘ili o ke kai. I loko o nā makahiki he kanalima paha e hiki mai ana, e ‘a‘ai ‘ia ana ia kahakai a nalo, a e komo ana ke kai i loko o nā lumi o lalo o nā hōkele a me ko lākou mau papahele mua. Wahi a kekahi po‘e, e aho ka wāwahi ‘ia o nā hōkele a me ka waiho ‘ana i ka ‘āina me kona mau mea uluwehiwehi i kīpapa ‘ole ‘ia i ke kīmeki.
E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 808-956-2627 (Laiana)
>> 808-956-2627 (Kekeha)
This column is coordinated by Kawaihuelani Center for Hawaiian Language at the University of Hawai‘i at Mānoa.
