Synopsis: Should students be allowed to use their cellphones in school? Despite all the pitfalls that could occur, the cellphone can be a valuable asset for education. Of course, it needs to be used judiciously.
Aloha mai kākou e nā hoa ‘imi na‘auao. I kēia wā, ua lilo mai nei ia mea he kelepona pa‘alima i nīnau nui no ka lehulehu e kama‘ilio ai. ‘O ia ho‘i, ua akamai paha kona hele pū ‘ana i ke kula me ka haumāna, ‘a‘ole paha? He mea maopopo, inā e lawe ‘ia ke kelepona i ke kula, e hopohopo ana kekahi po‘e o lilo loa auane‘i ka no‘ono‘o o ka haumāna i nā kumuhana like ‘ole he nui e loa‘a mai ana ma o ka pūnaewele, a e lilo ho‘i nā ha‘awina kula i mea ‘ole. Ma ka ‘ao‘ao kāko‘o na‘e, i mea kōkua ke kelepona i ka noi‘i ‘ana. I kēia wā, ke hāpai nei ka ‘aha‘ōlelo o ke kūlanakauhale ‘o Los Angeles i kekahi kānāwai e pāpā ana i ka ho‘ohana ‘ia o ke kelepona pa‘alima ma loko o kona mau kula aupuni. E ho‘omaka ana ka ho‘okō ‘ia o ua kānāwai nei i Ianuali o kēia makahiki a‘e. E hahana ana ke kū‘ē‘ē o ia mau ‘ao‘ao a ‘elua kekahi i kekahi. E nānā mua ‘ia paha ka ‘ao‘ao hō‘ole kelepona.
E like me kēlā la‘ana i hāpai ‘ia a‘ela ma luna, e lilo ana paha ka no‘ono‘o o ka haumāna i nā kumuhana pili ‘ole i nā ha‘awina kula. Ma kahi o ka noi‘i, e ho‘ohana ‘ia no ka nīele, a ‘oiai e nīele ana, e hala ana ka ha‘awina i ka pa‘a ‘ole mai. Wahi a kekahi po‘e, e hei ana nō kekahi mau keiki i ke kelepona a ‘a‘ole hiki ke pakele. ‘O ka pa‘a loa ho‘i o ia hei ‘ana, mali‘a o ho‘oma‘au ‘ia mai auane‘i ua po‘e keiki nei e kahi po‘e ho‘omāinoino. ‘Oiai ua hiki nō ke ‘e‘e ma luna o ka pūnaewele ma o ke kelepona i kēia manawa, e ho‘ouka paha ka po‘e kolohe i nā ki‘i ho‘ohilahila ma luna o ia pūnaewele me ka ho‘olele aku mai ‘ō a ‘ō, e la‘a nā ki‘i ho‘ohilahila i haku wale ‘ia me ka helehelena o ka luapo‘i. I kēia mau lā, ‘a‘ole wale nō he alo a he alo ia ‘ano hana. Ua hiki ke hana malū ‘ia, a he nalo ka mea nāna ia hana. ‘A‘ole wale nō ‘o ka hana ‘ino ka mea e hopohopo ai ma loko o ke kula, ua hiki ke ho‘ohana ‘ia ke kelepona no ke kikiti ‘ana ma nā kuisa a me nā hō‘ike paha. Pehea lā e na‘auao ai? ‘O ka nui o nā hopena ‘ino, ua mana‘o mai nei ke Kauka Kuhina Vivek Murthy e kākau i ‘ōlelo a‘o ma nā paena kūlelepaho like ‘ole no ia mau hopena ‘ino.
‘Eā, e ka makamaka heluhelu, mai nō a mana‘o mai he ‘ino wale nō ka hopena o ka lawe ‘ana i ke kelepona pa‘alima i loko o ke kula. Aia nō kona ‘ao‘ao maika‘i kekahi. Eia mai kauwahi ‘ao‘ao waiwai o ka lawe ‘ana i ke kelepona pa‘alima i ke kula. Ma waho a‘e o kona ho‘ohana ‘ia no ka noi‘i ‘ana, ka mea ho‘i e loa‘a koke mai ai ka ‘ikena pili i ka ha‘awina e ho‘opa‘a ‘ia nei, a ma kahi o ka hana kope lima ‘ana i nā mana‘o i kākau ‘ia ma luna o ka papa ‘ele‘ele, he pa‘i ki‘i wale ‘ia nō ka hana. Eia hou, ma kahi o ke kākau ‘ana i nā ‘ōlelo a ke kumu, ua hiki ke ho‘opa‘a ‘ia kona leo. A ma ka‘u mau papa ‘ōlelo Hawai‘i ma ke kulanui, ma kahi o ka halihali ‘ana i ka puke wehewehe ‘ōlelo Hawai‘i, a i ‘ole ke kamepiula pa‘alima, mai ‘ō a ‘ō, na ka manamanalima ka ‘imi ‘ana i ka mana‘o o nā hua pohihihi. A ‘o kekahi mea nui, ‘o ia nō ka palekana o ka haumāna. Ua hiki iā ia ke kāhea i kona ‘ohana, hiki ke kāhea i nā māka‘i ke pilikia, a hiki ho‘i ke lohe i nā kūkala maka‘ala pō‘ino.
Inā nō e akamai ka haumāna, e ho‘ohana ‘o ia i ke kelepona i mea e kōkua ai i kona ‘imi ‘ana i ka na‘auao. Inā na‘e e ho‘owalewale ‘ia ‘o ia e nā mea ‘ume wale i ka maka, e hala ana nā ha‘awina i ka ‘ike ‘ole ‘ia, a e hala ana ka na‘auao. E pa‘a ana paha ‘o ia ma loko o kona kūlana e noho nei, kahi e ho‘ā‘o hou ai.
