Synopsis: Dear friends honor Les Ceballos, one of Hawai‘i’s most respected icons in Hawaiian music, on his 70th birthday celebration held on Kaua‘i.
Ua pa‘ē maila ka leo kono e heahea mai ana i nā makamaka aloha e kipa aku i ka mokupuni ‘o Kaua‘i hemolele i ka mālie no ka ho‘ohanohano ‘ana iā Les Ceballos i kēia piha ‘ana o nā makahiki he kanahiku iā ia. A no laila, i ka Pō‘akahi nei, lā 3 o Iulai, ua ho‘olālā ‘o Zachary Lum a me ona mau pili ‘au ko‘i i wahi pā‘ina li‘ili‘i i lalo o Po‘ipū, kahi i ho‘opa‘a ‘ia ai no kēia launa pū ‘ana o nā hoa kāhuli leo o ka ‘āina. Ma laila, ma lalo nō ho‘i o ka malu hale o Waipuna, i ka welelau makani lawe lau kou, i ‘ike maka ‘ia ai ke kō a ia ‘ōlelo kaulana o Kūpuna mā “Ho‘okahi nō kaunu like ‘ana i Waialoha.”
‘Oiai, ua hānai ‘ia ‘o Les Ceballos i ke alo o nā pūpūkanioe o nā ‘ohana kua‘āina o Waimea me Kekaha, ua lilo ia mea he mele i kuleana ko‘iko‘i nona e ‘auamo ai. A no laila, no nā makahiki he nui wale, ua kama‘āina ko ia nei make‘e ‘ana no ka pono o nā mele Hawai‘i ma Ke Kula ‘o Kamehameha Kapālama. Ua lau a ua mano nō ho‘i nā haumāna a ua Les nei i a‘o ai a i loko nō o kēia ne‘e ‘ana o ke au o ka manawa, ua lilo nō ho‘i kāna mau haumāna, ‘o lākou kekahi hapa nui o nā mea mele kaulana e pāhola nei i ko lākou kālena ma luna o nā kini kīhene pua o kēia wā. Ua pōmaika‘i pū nō ho‘i nā hālau hula a me nā papahana ho‘oheno mele o nā kula nui a me ke kaiāulu nō ho‘i i ko Les lokomaika‘i ma ke kōkua a me ke kāko‘o nō ho‘i iā lākou.
Ma ia pā‘ina like pū ‘ana o mākou, ‘oiai ho‘i e mā‘ama‘ama mai ana ‘o Kawaihoa i ka pā kōnane a Māhealani, ua hāpai ‘ia nā ‘ano ‘ōlelo ho‘onupanupa a ia mea he aloha i mua o Les me ka mana‘o ho‘i e mōakāka ko mākou mahalo i mua o kona alo. Ua piha pū nō ho‘i ia pō le‘a o Halāli‘i i nā puana o nā mele kuluma i kama‘āina loa, kohu pine i ‘ōmou ‘ia a pa‘a ma ka ho‘omana‘o ‘ana o nā hoa mea mele i hiki mai! A laila, ma ia ahiahi nō, ua ho‘omaka mākou e wae i mau lālani mele kūpono e pa‘a ai ka puana o ka mo‘olelo o ia pō. Ma nā paukū i pāku‘i mai ai kēlā me kēia haku mele i ko lākou mana‘o a i ka hola i lolokū ai ka lā o ka Pō‘akolu nei, ua pa‘a kēia ho‘oheno no Les Keāiwaauali‘ikūikeao‘ōnohi Ceballos:
A ka ‘olu mākou i Po‘ipū
Pukuku‘i i ke ahe lawe lau kou
A he lau a he mano ke aloha
No ke ‘ala o ka maile lau li‘i
Laua‘e nei ‘upu a ka hali‘a
I ka leo hone o ka ‘āina
Luana i ke kani hone a ka piano
E nahenahe ana i ke kulu aumoe
Ke au nei ka manaʻo o nā manu
I ke kau mai o Māhealani moon
‘O lovely moonbeam i ka ua noe
Noenoe i ke awa ‘o Kawaihoa
He hoa mau ‘oe no ka lehulehu
A he lei luhiehu e ho‘oheno ai
He waiwai nō ka ho‘oluana
E nanea, e walea i ka la‘i o Ho‘onē
Ho‘ōla ē ka lā e nōweo nei
I ulu a nohea nā kini kīhene pua
Ehehene ka nenehe ehuehu kai
Ho‘oipo ana lā me Hale Waipuna
Pūnāwai ka li‘a e nē mai nei
“E ho‘i a‘e i ka poli o Hā‘upu”
Hi‘ipoli ‘ia ka ‘ano‘i o loko
No Keāiwaauali‘ikūikeao‘ōnohi
Haku ‘ia na Holeka & Makakoa Inaba, Keawe Lopes, Zachary & U‘ilani Lum, Lina Robins, Nāpua Silva, Kahanuola Solatorio, Chad & Lisa Takatsugi, Kalua Tataipu & Kaleo Trinidad.
E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 808-956-2627 (Laiana)
>> 808-956-2627 (Kekeha)
This column is coordinated by Kawaihuelani Center for Hawaiian Language at the University of Hawai‘i at Mānoa.
