Synopsis: The woman from Illinois who allegedly used a fake vaccination card to avoid quarantine has been mocked for spelling Moderna incorrectly. The state of Hawai‘i, however, released her based on her word that she would return for trial. Who is the real fool here?
Aloha mai nō kākou. Ua kuku‘i mai nei ka lono no kahi wahine malihini i ‘a‘a mai i ke komo hewa ‘ana ma ko kākou ‘āina nei me ka pale ho‘i i ke kānāwai o ka moku‘āina, a ua lilo ia i mea e ‘aka‘aka ai no kona ‘ano hūpō a ‘ūlala nō ho‘i. He kānāwai ia e koikoi ana i nā malihini a pau e hō‘oia i ko lākou kui hou ‘ia me ka lā‘au pale Covid, a i ‘ole ia, e hō‘oia i ko lākou olakino maika‘i ma o kekahi ho‘ā‘o ‘ana i ka walewale o loko loa mai o ka puka ihu. Inā e hiki mai kahi malihini i pa‘a ‘ole iā ia kekahi o ia mau mea, e koikoi ‘ia kona noho ka‘awale ‘ana a hala he 10 lā, a hala pū ho‘i me ia ma‘i. ‘O ia wahine na‘e, he pūlapu mai ka hana me ka hō‘ike mai i kahi palapala ‘āpuka, a ‘o ka mea ‘āpiki, ua pela hewa ‘ia ka inoa o ka hui nāna ia lā‘au i hana.
Aloha nō kahi wahine, ‘o Chloe Mrozack, no Illinois mai. Nui ka ‘aka‘aka ‘ia no ka pela ‘ia o ka inoa “Moderna” penei: “Maderna”. Na wai e ‘ole ka ‘aka‘aka ‘ia ua halahī ka no‘ono‘o pēlā? No‘u iho, ‘a‘ohe o‘u ho‘ohalahala i kona ho‘okē i ka lā‘au, aia nō ia i kēlā me kēia kanaka. Eia na‘e, inā pēlā ke koho, aia nō ka hele ‘ana mai i Hawai‘i nei a ho‘ā‘o ‘ia kona walewale a hō‘oia ‘ia ka loa‘a ‘ole o ka ma‘i. ‘A‘ohe ho‘okō ‘ia kekahi o ia mau koina ‘elua, a no laila, aia ka pono ‘o ko ia ala noho ka‘awale ‘ana he 10 lā i ‘ole e laha loa kahi ma‘i mai ‘ō a ‘ō. No ka minamina na‘e paha i ia mau lā, ua koho akula i ke ala o ka pūlapu – a ua loa‘a pono ka ‘iole i ka pūnana!
Alia na‘e e kū mai ka lau lama a e ho‘omaika‘i paha nā ‘ākena o kahi aupuni ho‘opunipuni iā lākou iho. Ua hō‘ike mua mai ua wahine nei i kona ‘ano pūlapu ma o ka ho‘ā‘o ‘ana e ho‘ohana i ua palapala ‘āpuka lā. ‘O kona kumu ia i hopu ‘ia ai a ho‘opa‘a ‘ia ho‘i i loko o ka hale pa‘ahao! ‘A‘ole anei e ahuwale loa kona ‘ano pūlapu ma laila? Eia hou, ma muli o kona akamai i ka ho‘owalewale, ka ho‘omeamea mihi me ka ha‘uha‘u uē, a me ka ho‘ohiki ho‘i e ho‘i mai i ka hale ho‘okolokolo, ma o ka Zoom, no ka ho‘okolokolo ‘ia o ia hihia, ua ho‘oku‘u ‘ia ‘o ia e hele lanakila ai i kona wahi e hele ai.
I ka hiki ‘ana mai o ka lā e ho‘okolokolo ‘ia ai, ‘a‘ole ‘o ia ala i ‘e‘e mai ma luna o ka Zoom. E kūnānā ana paha nā loio a me ka luna kānāwai. Auē! Aia i hea ‘o Chloe? ‘Eā, e ka makamaka heluhelu, he wahi mana‘o ho‘ohuoi nō ko‘u. Aia nō paha ‘o ia ma kona wahi i hele mai ai ke hāikaika maila i ka po‘e puni wale o ke aupuni moku‘āina, me ka ‘aka‘aka pū mai ho‘i i ka nui o ko lākou ‘ano hūpō a ‘ūlala nō ho‘i.
E o‘u hoa Hawai‘i. E aho nō paha ka ho‘opoina ‘ana o ke aupuni i ua wahine pūlapu nei a e ho‘opau nō ho‘i i ka ‘aka‘aka ‘ana a ka lehulehu i ka hemahema o kā ia ala pela ‘ana. Maika‘i ho‘i ke ku‘upau ‘ana i ka ikaika ma ka ho‘onalonalo ‘ana i ke ‘ano kāpulu o kā lākou hana a e ho‘omaiau ho‘i i ka hana, i mea e mau ai ka mana‘o o nā kānaka he aupuni maoli nō ia. A i mea ho‘i e kau ai ke ko‘iko‘i o ke olakino o nā maka‘āinana ma luna o ka puni kālā, e maka‘ala ‘ia ka ma‘i o komo malū mai i loko o ka hale.
E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)
This column is coordinated by Kawaihuelani Center for Hawaiian Language at the University of Hawai‘i at Mānoa.
