Synopsis: Kūha‘o Maunakea, the songs of Mauna Kea are ready and can be found at kanaeokana.net/Maunakea Opens in a new tab. Proceeds will go to Pu‘uhuluhulu.
‘O ‘Oe ia e Mauna Kea
Mauna Kea i ka ‘ihi kapu aloha
Mauna Kea i ke āiwaiwa noho anu
Ka ‘ohu kāhiko o ke kapa hau
‘O Mauna Kea ‘Oe
He leo kēia e ualo aku nei i ka hikina a ka lā puka i Ha‘eha‘e, e kū ana ho‘i i ka hene wai ‘olu o Mauna Kea e hulali mā‘ama‘ama mai ana ka ‘ili wai kamaha‘o o Waiau, aia lā i ka piko o ke kuahiwi, a hiki aku i Ni‘ihau i ka welelau makani Mikioi, ka makani nowelo piko o Lehua. A ho‘i mai i O‘ahu, ka ‘ōnohi o nā kai, me ka ua o Honolulu e kūkala mau mai ana ma nā kaupoku o kauhale nei. Welina me ke aloha iā kākou a pau!
He wahi leo ho‘omaika‘i kēia iā Kanaeokana, The Kula Hawai‘i Network o Kamehameha, ka ‘ōnaehana ho‘i “… e kupu ai a kawowo a lau a mu‘o a ‘ao a liko a pua nā ulu koa hou o kēia mua aku …”, i ka ho‘olālā ‘ana i papahana e ho‘o‘ili‘ili ‘ia ai nā mele ho‘oheno Mauna Kea i haku ‘ia aku nei ma muli o ka ulu o ka na‘au o kānaka i ke kīpū a kūpa‘a i ke aloha ‘āina. Ua kono ‘ia he mau haku mele no ka ho‘opa‘a ‘ana i ko lākou mau lei mo‘olelo i wili ‘ia a hao ā pa‘ihi no Mauna Kea, me ka mana‘o ho‘i, e lilo ia papahana i mea kū‘ai ‘ia ma ka pūnaewele, i kālā ho‘i e ho‘olako ai iā Pu‘uhuluhulu, kahi e lāhui nei ka lāhui. Ma muli o ka ‘eleu ka‘uka‘u lua ‘ole o nā lima huli i lalo, i ho‘opau koke ‘ia ai kēia papahana, nei hiwahiwa a ka lāhui, ‘o ia ho‘i ‘o Kūha‘o Maunakea.
Ke hā‘awi aku nei au i ku‘u leo mahalo iā Ryan “Gonzo” Gonzalez no ka ho‘olauka‘i ‘ana i kēia papahana. Pēlā pū me Shawn Pimental, Michael Grande, Kanai‘akukui Nakamura, Kamaoli Kuwada, Kēhaulani Abad a me nā limahana ‘ē a‘e ho‘i o Kanaeokana, no ka ho‘oholomua ‘ana i kēia papahana nui o ke ko‘iko‘i. A huli mai nei ku‘u wahi leo mahalo nui palena ‘ole i nā hoa make‘e lāhui ‘elua i noke mau i kaua mea he luhi aloha, a pau pono kēia papahana, ‘o ia nō ‘o Chad Kaleo Takatsugi me Zachary Alaka‘i Lum. No lāua nei kēia mau lālani ho‘ohanohano, ‘oiai, i ko‘u wā i lohe mua ai i ke mele a ko‘u ‘ohana i makana ai i kēia papahana, hikilele a‘ela kēia, he mele kā, he ho‘oheno ho‘i!
Kū maila ke kāhiko ‘ōnohi ‘ula i ka lani
Ahonui ana i ka hoa ua o ke Ki‘owao
Lei hi‘ia na ke kāwelu holu ‘ōpua o ke kualono
E lono mai ana Lanihuli i ka ho‘ōho aloha ‘āina
O ke kia‘i o Pū‘iwa, ku‘u lei rose mau!
—- ‘O ia —- ka‘u a e ‘upu a‘e nei
Ziona lamakū ‘oe i ke kakahi o ke aka hikina
A mālamalama i ka lā puka ma Ha‘eha‘e
Choni ‘oe a koni ho‘i hā i ka make‘e lāhui
Hawai‘i aloha kou mākia e kūlia mau ana
A nā ‘ōnohi aloha ‘āina a e ho‘oheno nei
Rei hulu ali‘i ‘oe o ka ‘āhui manu nēnē ‘ili kapu
You nō e ke ALAKA‘I, ke hoa ‘ānela kia‘i mau!
—- ‘O ia —- ka‘u a e ‘upu a‘e nei
A no laila e ka lāhui aloha ‘āina pu‘uwai hāmama mau, e e‘e ma kanaeokana.net/Maunakea a e kū‘ai i kēia pāleo hou ‘o Kūha‘o Maunakea i hiki ke kāko‘o ‘ia nā ‘ohana ‘ō‘ili pulelo hae Hawai‘i, nā koa noho mauna ho‘i e kū kia‘i nei i ka malu ‘ihi‘ihi o ka pōnaha lani. Me lākou ku‘u aloha nui palena ‘ole!
Kāhelahela ka hālau ‘ōpua lani i ka nahele
E māmalu ai ka ‘ōiwi pali Pu‘uhuluhulu
He hulu kaumaka, hulu kūpuna, hulu ali‘i i ke kuhi mai
E koa, e wiwo‘ole i ke kū kia‘i mauna
No Mauna Kea ē!
E ho‘ouna ‘ia mai nā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)
This column is coordinated by Kawaihuelani Center for Hawaiian Language at the University of Hawai‘i at Mānoa.
