Synopsis: Two women basketball players are each called with a technical foul because of a kiss on the cheek during the first game of the WNBA Western Conference Finals.

———

Welina e nā makamaka heluhelu o Kauakūkalahale. ‘O ia ‘ōlelo e kau a’ela i luna i po’o mana’o no kēia mo’olelo nei, ‘o ia ho’i, Hō mai ka ihu a hele a’e au. No loko mai ia o ke oli a Hi’iakaikapoliopele i kona wā e hele ana e ki’i aku i ke kāne a lāua ‘o Pele, iā Lohi’au. He noi ia na Hi’iaka i kona kaikua’ana i mea paha e ‘olu’olu ai kona na’au, a mālama pono ‘ia ke aikāne, ‘o Hōpoe. ‘O ka pilikia nō na’e, i luna ‘o Hi’iaka o ka pali a noi ana, E hō mai ka ihu a hele a’e au. Inā paha i noi aku ‘o ia i kona kaikua’ana i ka ihu ma mua o ka ho’omaka ‘ana o ka huaka’i, inā paha ua nā ka inaina a ‘a’ohe pō’ino i hēkau ma luna o ke aikāne a Hi’iakaikapoliopele. ‘A’ole ho’i e hihi, ua ha’alele wale ‘o Hi’iaka me ka honi ‘ole i kona kaikua’ana, a pane ai ‘o Pele, “Ina no hoi paha he moloa kou, e kena wahi kaikamahine, hoi mai no hoi oe.”

E ka makamaka heluhelu, he mea nui paha ka hā’awi aloha ‘ana ma o ka honi. He hō’ike paha ia, ‘a’ole e ho’omauhala nei kekahi ‘ao’ao. A he hō’ike nō ho’i ia i ke aloha o kekahi i kekahi.

A ‘o ia ihola nō ka mea e kau a’ela ia lālani oli a Hi’iaka i po’o mana’o. I ka ho’okūkū mua ‘ana o ka ‘Aha Komohana o ka ‘Ahahui Kinipōpō Hīna’i Moku’āina o nā Wāhine, kahi e kū’ē aku ana ‘o Phoenix iā Minnesota, ua ho’opa’i ‘ia ‘elua mau mea pā’ani, ‘o Diana Taurasi o Phoenix lāua ‘o Seimone Augustus o Minnesota, no ka honi ‘ana aku o Taurasi iā Augustus. No ke aha lā lāua i ho’opa’i ‘ia ai? He hō’ike paha ia i ke aloha a ‘a’ole e ho’omauhala ana kekahi i ka hoa paio. ‘A’ole ka honi ‘ana he mea hou ma ka pā’ani pōpō hīna’i. Ho’omana’o a’ela paha ‘oukou, e nā makamaka heluhelu, i ka honi ‘ana a’e o Ho’okalakupua Ionakona lāua ‘o Isaia Kamaki ma mua o kekahi ho’okūkū i ka makahiki 1987. He mau hoa nō lāua a ua mōakāka nō, i loko nō o ke ku’upau ‘ana e lanakila, ma hope o ka ho’okūkū ‘ana, he mau hoa ana nō lāua.

Pēia nō paha ‘o Taurasi lāua ‘o Augustus. Ua kama’āina lāua kekahi i kekahi mai ka wā kamali’i mai. Pehea lā kahi ‘uao nāna i ho’opa’i aku iā lāua? E hopohopo ana paha ‘o ia o ho’omaka ke kaunu ‘ana o lāua i mua o ke anaina māka’ika’i?

‘O ka honi ma waena o kekahi mau hoa ‘elua,’a’ole ia he mea e ho’opa’i ‘ia ai ka mea pā’ani ma ke kahua pā’ani. He ‘oi aku ia ma mua o ke pa’i māhanahana a me ka lima ku’i paha o Pele, ‘o Kīlauea, a me ka wāwae peku paha o Bruce Lee.

‘O Minnesota, ua lanakila ma ia ho’okūkū mua, a pau loa ka inoa moho i nā Lineka o Minnesota. A ho’omau nō lākou a pa’a ihola ka inoa moho o ka ‘Ahahui Kinipōpō Hīna’i Moku’āina o nā Wāhine ma ka luku ‘ana aku iā Atlanta i loko o nā pā’ani ‘ekolu.

———
E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.