Synopsis: Some things in life might be irritating and troublesome, but with trials and tribulations come time for learning and growth.
———
Welina mai e nā hoa makamaka heluhelu o Kauakūkalahale. E ha’i mai i ku’u nane, ku’u wahi holoholona ‘āhiu hele pū me ke kanaka, a inā nō e loa’a, e pepehi ‘ia ana a make, a inā nō na’e ‘a’ole e loa’a, e ho’iho’i ‘ia i ka hale e noho pū ai. Na ka ‘eleu nō ia e ho’omaopopo. ‘O wai lā ho’i ‘oukou e nā keiki o Kalae mai?
I kēlā pule aku nei, ua pū’iwa maila ko ‘oukou wahi mea kākau. I ke kalaiwa ‘ana i kekahi pā’ina, nānā akula au i ke aniani kīlohi. ‘O ko’u ‘ike akula nō ia i nā hoa li’ili’i he nui hewahewa e mana’o nei paha e hele pū mai me a’u i ka pā’ina. I ia ‘ike ‘ana i ua mau hoa li’ili’i nei, pau ihola ko’u ‘i’ini e hele i ka pā’ina. ‘O ka huli koke akula nō ia a ho’i aku i kauhale. ‘A’ole i kono ‘ia ua po’e hoa nei e hele i ka pā’ina a ‘a’ohe po’e ma ka pā’ina e hau’oli i ka ‘ike mai i kēia ‘ano hoa li’ili’i.
No ia pule holo’oko’a, ma kahi o nā hana ma’a mau, he nui nā hana e pono ai ka ho’oma’ema’e ‘ana i nā mea i ho’ohaumia ‘ia e ua po’e hoa li’ili’i nei. ‘O nā lole ‘oe, ‘o nā uluna ‘oe, ‘o ka moena, a me nā mea like he nui aku nō. Eia na’e, ‘o ka mea i ‘oi a’e kona komo hewa ‘ia, ‘o ia nō ko’u lauoho. Ua pono e ‘ako ‘ia ku’u lauoho lō’ihi, ka mea ku’uwelu mau mai ma luna o ko’u mau po’ohiwi, a pōkole.
Ma muli o ke kaumaha, he nui hou aku nā hana ma’a mau i hana ‘ole ‘ia. I ko’u ‘ike ‘ana i ka ‘eu mai o ua mau hoa nei i luna o ko’u lauoho, ua kelepona au i ku’u kaikaina. Noho pū māua i ka lumi ho’okahi, no laila, hō’ike koke akula au iā ia i hiki iā ia ke maka’ala ‘o ka hō’ea mai o ua po’e hoa nei ma kona lauoho. ‘A’ole na’e pēlā. Ua pakele ‘o ia i ia luhi!
Nui ke kōkua o ku’u kaikaina a me ko’u mau hoa aloha i ko’u wā kūpiliki’i. I kēlā me kēia lā, kahi maila lākou i ko’u lauoho me ka huli aku ho’i i nā ‘uku. Eia hou, ua maopopo iā lākou he mea ho’olu’ulu’u na’au ka ‘ako ‘ia o ko’u lauoho a pōkole, a no laila, ua lilo lākou i hoa ‘alo pū i ka ‘īnea a ua paipai mau mai ia’u a lana mai ka mana’o no ka hiki hou mai o nā lā hau’oli. Ua kōkua mai ho’i lākou i ka hana ‘ana i ka’u mau ha’awina i hō’alo ‘ia ma muli o ka nui o ke kaumaha.
Eia mai nō ka mea ‘āpiki. ‘A’ole ia he mea mau ia’u ka hō’ike aku i ko’u mahalo i ka po’e nāna au e kōkua mai. He mana’o ko’u ua lawa au ia’u iho a ua ‘ae’oia ho’i. Ma muli na’e o ka nui o ke kōkua a ko’u mau hoa a me ko’u kaikaina i ka ho’omanawanui ‘ana i kēia pilikia, no laila, ua maopopo, ke ‘ole ko lākou kōkua, pilikia maoli nō au. No laila, he wahi mahalo kēia i ko’u mau hoa aloha a me ko’u kaikaina. He mea nui ka mahalo ma ka mālama ‘ana i nā pilina maika’i o nā hoa a me nā ‘ohana, a pau pū ho’i me ke Akua. Mai nānā wale i nā mea ‘ino. Ma kēlā me kēia mea pilikia, aia kekahi ha’awina e a’o ai.
———
E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa.
