Synopsis: To raise Hawai’i’s competitive edge, we must foster curiosity.

‘O Hawai’i nei kahi i haku ‘ia ai ka pila ‘ukulele na Nunes, do Espírito Santo, a me Dias i ka 1879. Haku ‘ia ke kīkā kila e Kekuku i ka 1880. I ka 1911, na Ginaca i haku i kekahi mīkini nāna e ‘ihi i ka ‘ili o ka halakahiki a wehe i kona ‘īkoi me ka māmā loa no ka hui mahi halakahiki. He mau mea hou aku nō he nui i haku ‘ia ma Hawai’i nei, he ‘ano pahi pelu, he noho ‘opi’opi ‘ia no ka hali i loko o kekahi paiki pa’a lima, a he mea ho’okaulike ho’i i nā huila o ke ka’a kekahi o ia mau mea. Ua lilo ka ‘oihana pili i ka pila ‘ukulele he ‘oihana he mau piliona o ke kālā, a he pila i aloha nui ‘ia ā puni ka Pākīpika nei a me nā wahi like ‘ole he nui o ke ao. Ua hele ka pila kīkā kila ā kaulana loa ma waena o nā pāna a me nā pu’ukani country a he mau piliona ke kālā loa’a ma ia ‘oihana.

‘O kekahi mau mea hou i haku ‘ia ma Hawai’i nei i kēia mau makahiki hope nei, ‘o ia ho’i, he ‘ano lina hao no ka ho’oponopono ‘ana i ka pale wāwae laholio ke hemo ke kā’awe. Ho’okomo ‘ia kēia lina hao ma ka puka o ka pale wāwae i ‘ole e hemo hou ke kā’awe. ‘O kekahi mea aku, he ‘ano kīmeki me nā ma’awe li’ili’i loa i loko nāna e hō’ike i ka pono o ke kīmeki i ke au ‘ana o ka manawa. Inā ‘oā ke kīmeki, hō’ike nā ma’awe i kahi i ‘oā ai a me kona nui. Hō’ike pū ‘ia ka nui o ke kaumaha a me ka heluna ka’a e holo ana i luna o ke alanui kīmeki.

Haku ‘ia kēia mau mea ma Hawai’i nei ma muli o ka no’ono’o nui o ka nīele i ka hana ‘ia ‘ana o nā mea like ‘ole. He mau mea nō kēia e ‘ohi ai i ke kālā ma ka miliona a me ka piliona.

Hō’ike ‘ia he mau lā aku nei ua pi’i ka nui o nā mea i haku ‘ia ma Hawai’i i ka 2010 ma mua o kekahi mau makahiki i hala ma mua. Eia nō na’e, ua hō’ike ‘ia nō ho’i i kekahi lā mai, ua emi nā ‘ai o nā haumāna kula o Hawai’i ma ka ‘ao’ao akeakamai ā nui ma mua o kekahi makahiki ma mua. Ke ho’ohālike ‘ia me nā moku’āina o ‘Amelika, aia nā ‘ai o nā hō’ike akeakamai o nā haumāna o Hawai’i kokoke i nā ‘ai o lalo loa.

Ua haku ‘ia nā mea i haku ‘ia ma Hawai’i nei ma muli nō o ke kūlana nīele i loko o ka mana’o o kēlā me kēia kanaka. Ha’oha’o ‘o ia i kekahi mea a pilikia paha a no’ono’o ‘o ia i nā ‘ano hana e hō’oi a’e ai i kona pono. ‘O kēia kūlana ha’oha’o ka mea e ho’oulu ai i loko o nā kānaka o Hawai’i nei. Pono e ho’ouna ‘ia nā kumu kula akeakamai i nā papa hana no ke a’o ‘ana i ke a’o ‘ana i hiki iā lākou ke a’o pono i ka hoihoi a me ka pono o ka nīele ‘ana no ka hana ‘ia ‘ana o nā mea like ‘ole o ke ao. ‘A’ole nō hiki ke ho’ohalahala i nā haumāna i ka emi o ko lākou mau ‘ai ma ke akeakamai. ‘Oi loa aku ka maika’i ke kōkua ‘ia nā kumu ma ke a’o ‘ana i nā ‘ano mana’o hou no ke a’o ‘ana i hiki ke a’o ‘ia kamali’i i nā mea e hoihoi ana iā lākou me ke ake e nīele a ha’oha’o nui i ka hana ‘ia ‘ana o nā mea like ‘ole. Pēlā nō ho’i e hō’oi ‘ia a’e ai ke kūlana o Hawai’i nei he wahi o ka ho’opuka ‘ia ‘ana o nā mea hou o ka honua nei. E hana ‘ia i Hawai’i nei.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.