Synopsis: So much negative press has surrounded this presidency, much of which predates the election. The negative reports should be curtailed so that truly egregious acts will be recognized as such, and not seen as normal behavior. This is not an issue of accuracy. It is about avoiding apathy.
Aloha mai nō e ka po‘e puni nūhou politika. Ua hele a huli kua nā ‘ale o ke kai a ka‘awale loa nā hui politika nui ‘elua o ‘Amelika Hui Pū ‘Ia, ‘o nā Kemokalaka a me nā Lepupalika. A eia nō ke nui nei ke kōā ma waena o ua mau ‘ao‘ao lā a i ‘elua. Ke kū‘ē‘ē nei kekahi ‘ao‘ao i ko kekahi i mea e kū‘ē‘ē wale ai nō. ‘A‘ohe wahi nānā i ka maika‘i a me ka ‘ole o ka mana‘o. He nānā wale ‘ia ka nui o nā pāloka e loa‘a mai ana. Pēlā nō lākou e ho‘oholo ai i ka pono a me ka ‘ole o nā nīnau a pau.
‘O au kekahi i hele a pau ka pū‘iwa i nā hana kohu ‘ole a ka po‘e politika a me ka po‘e kūkala nūhou no nā kumuhana politika. He ‘elua ‘ikena ‘oko‘a e kuhi ‘ia nei ma ke ‘ano ‘o ia ka ‘oia‘i‘o. Pehea lā na‘e e ‘oia‘i‘o ai ‘elua ‘ao‘ao e kū‘ē‘ē ‘oko‘a nei kahi a me kahi? Eia ke kāhea ‘ia nei nā hō‘ike nūhou a CNN i ka ‘alapahi (fake news). A ‘a‘ohe wahi nele o ko CNN pāna‘i ho‘ohalahala aku i ka Pelekikena Trump i ka ho‘opunipuni a me nā hana kohu ‘ole he nui. ‘O ka ho‘ohalahala aku iā Fox News i ka hō‘ike pā‘ewa‘ewa, ‘o ia kekahi. Aia lā i hea ka ‘oia‘i‘o? No‘u iho, he ‘elua ‘oia‘i‘o e hilina‘i ‘ia nei. Aia nō i ka ‘ao‘ao a ka mea koho e kāko‘o nei.
‘O au kekahi i koho pāloka, i loko nō o ko‘u kū‘ē‘ē ‘ana i ka hana hewa a ‘Amelika i lawelawe ai ma luna o ke aupuni Mō‘ī o Hawai‘i. He hana nui ke koho. ‘A‘ole na‘e au e hō‘ole. ‘O ka mana‘o mua, ‘o ia ke koho iā Trump i mea e hana ‘ino ai iā ‘Amelika. Ma hope mai, ua mana‘o au, ‘a‘ohe pono i laila. No laila, ua koho au iā Clinton me ka mana‘o aia i laila e lana ai ka mana‘o no ka ho‘iho‘i ‘ia mai o ke ea o ka ‘āina i ka pono. Aloha ‘ino ka lilo ‘ana o ke eo iā Trump!
Ma ia hope mai, nānā au i ke kūkala nūhou ma luna o ke kīwī, a heluhelu paha ma luna o ka pūnaewele, a i kēia manawa, ke ‘ike nei au i ke kūpono ‘ole o kahi Trump a me ka puni wale o nā maka‘āinana iā ia. ‘O ka nui o nā hana kohu ‘ole a ua ‘o Trump i lawelawe ai, a me nā ‘ōlelo ho‘opunipuni ho‘i āna i ho‘opuka ai, ua hele a ma‘a au i ia ‘ano ona, a ua hapa mai ko‘u pū‘iwa i ka palena ‘ole o kāna mau hana kū ‘ole i ka pono.
Auē! Ke ma‘a nei au i ia ‘ano hana, a no kēia ma‘a ho‘i, ke hapa mai nei ko‘u mana‘o no ke kohu ‘ole o kāna hana. Ke noke nei na‘e ka ho‘ohalahala ‘ana a ka po‘e nūhou i kā ia ala mau hana. Ke lilo nei ho‘i kēlā mau hō‘ike i mea ma‘a mau. Ho‘opūlapu malū ‘ia ko‘u no‘ono‘o i kā ia ala hana he hana pono ia na ka pelekikena, a ke hapa mai nei ko‘u pū‘iwa a me ka ukiuki i ka heluhelu a me ka lohe paha i ia mau mo‘olelo. Ua ma‘a maila!
I kekahi mau mo‘olelo, ho‘ohalahala ‘ia ‘o Trump, a ua ho‘onui wale ‘ia ka hewa o kekahi hana li‘ili‘i. ‘O ka hopena o kēia ‘imi wale i ka hala, ‘o ia nō ka hapa mai o ka nui o ka hewa. E ho‘omanawanui ‘ia nā mea iki i ‘ike ‘i‘o ‘ia ka ‘ino maoli ke ‘ō‘ili mai.
E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)
This column is coordinated by Kawaihuelani Center for Hawaiian Language at the University of Hawai‘i at Mānoa.
